Чӑваш Ен Ҫӗпӗр мурӗнчен сыхланмалли 750 доза вакцина туяннӑ. Вӗсем республикӑна ҫитнӗ ӗнтӗ.
Чи малтанах ку прививкӑна ҫак мур ерме пултаракан ҫынсене тӑвӗҫ. Ҫав йышра – ял хуҫалӑх ӗҫченӗсем, фермӑра тӑрӑшакансем, выльӑх пусакансем, аш-какай комбинатӗнче ӗҫлекенсем, сӑран тир савучӗн ӗҫченӗсем, ветеринарсем…
Аса илтерер: Ҫӗрпӳ районӗнчи Кивӗ Тутайкассинче икӗ ҫын Ҫӗпӗр мурӗпе чирленине палӑртнӑ.
Ҫӗрпӳ районӗнчи Кивӗ Тутайкассинче упӑшкипе арӑмӗ Ҫӗпӗр мурӗпе чирленине Чӑваш халӑх сайчӗ пӗлтернӗччӗ. Аса илтерер: вӗсем килте вӑкӑр пуснӑ хыҫҫӑн чирленӗ.
Асӑннӑ пӑтӑрмах хыҫҫӑн РФ Следстви комитечӗн Чӑваш Енри тӗпчевҫисем пуҫиле ӗс пуҫарнӑ. Кил хуҫи вӑкӑра Ҫӗпӗр мурӗнчен вакцинацилемен пулнӑ. Выльӑх-чӗрлӗхе вӑл ветеринара та кӑтартман.
Ветеринари правилисене пӑснӑшӑн Кивӗ Тутайкасси арҫынни тӗлӗшпе РФ Пуҫиле кодексӗн 249-мӗш статйин 1-мӗш пайӗпе пуҫиле ӗҫе маллала тӗпчеҫҫӗ.
Чӑваш Енри тӑваттӑмӗш ҫын Ҫӗпӗр мурӗпе чирленине пӗлтернӗ. Аса илтерер: ӗнер виҫҫӗмӗш ҫын пулнӑ. Вӗсем иккӗшӗ те Мускав облаҫне ӗҫлеме кайнӑ пулнӑ. Арҫынсене унта пульницӑна вырттарнӑ.
Анчах каярахпа ку хыпар тӗрӗсех маррине пӗлтернӗ. Ҫав икӗ арҫыннӑн Ҫӗпӗр мурӗ мар иккен: диагноз ҫирӗпленмен.
Аса илтерер: Ҫӗрпӳ районӗнчи Кивӗ Тутайкассинче упӑшкипе арӑмӗ Ҫӗпӗр мурӗпе чирленине палӑртнӑ. Вӗсем килте вӑкӑр пуснӑ хыҫҫӑн чирленӗ. Мускав олаҫне ӗҫлеме кайнӑ ҫав 2 арҫын, кӳршисем, вӗсене выльӑха пусма пулӑшнӑ.
Ҫӗрпӳ районӗнче пурӑнакан тепӗр ҫыннӑн Ҫӗпӗр мурӗ пулнине палӑртнӑ. Ку – виҫҫӗмӗш тӗслӗх.
Ӗнер каҫхине тухнӑ хыпара ӗненес тӗк, арҫыннӑн сулахай хӑлхи ҫинче тӗттӗм тӗслӗ пӑнчӑ тухнӑ.
Аса илтерер: Ҫӗрпӳ районӗнчи Кивӗ Тутайкассинче пурӑнакан арӑмӗпе упӑшки вӑкӑр пуснӑ хыҫҫӑн Ҫӗпӗр язвипе чирленӗ. Ку ялта карантин пулнине йышӑннӑ: машинӑсене кӗртмеҫҫӗ, кӑлармаҫҫӗ. Чирлисемпе хутшӑннӑ 130 ҫынна сӑнаса тӑраҫҫӗ.
Тутарстанри «Аввангард» обществӑн генеральнӑй директорне Николай Курчаткина «Чӑваш Республики умӗнчи тава тивӗҫлӗ ӗҫсемшӗн» орден медалӗпе чыслама йышӑннӑ.
Николай Григорьевич 1963 ҫулхи пуш уйӑхӗн 19-мӗшӗнче Ҫӗрпӳ районӗнчи Кивӗ Тутайкасси ялӗнче ҫуралнӑ. Ҫӗрпӳри ял хуҫалӑх техникумӗнче, Чӑваш патшалӑх ял хуҫалӑх академийӗнче, Патшалӑх службин Атӑл-Вятка академийӗнче вӗреннӗ.
Хӑй вӑхӑтӗнче Николай Кручаткин Ҫӗрпӳри сельхозхимие те ертсе пынӑ, Ҫӗрпӳ районӗнчи ял хуҫалӑх управленийӗнче тӑрӑшнӑ.
2005 ҫулхи чӳк уйӑхӗнче ӑна «Авангард» обществӑн «Ҫӗрпӳри бекон» филиалне ертсе пыма шаннӑ, 2011 ҫулхи ҫӗртме уйӑхӗнченпе асӑннӑ обществӑн гендиректорӗнче тимлет.
Ҫӗрпӳ районӗнчи икӗ ҫын Ҫӗпӗр язвипе чирлени пирки пӗлтернӗччӗ. Аса илтеретпӗр: унта арӑмӗпе упӑшки вӑкӑр пуснӑ чухне суранланнӑ. Выльӑх вара чирлӗ пулнӑ. Арҫынпа хӗрарӑм хӑйсене япӑх туйма пуҫласан пульницӑна кайнӑ. Унччен вара вӗсем 500 килограмм какая сутса ӗлкӗрнӗ. Хӑйсем каланӑ тӑрӑх, чикансене сутнӑ. Лешсем халӗ ӑҫта пулни паллӑ мар. Малтанлӑха палӑртнӑ тӑрӑх, вӑкӑр лавккаран туяннӑ апата пула чирлеме пултарнӑ.
Республика ертӳлӗхӗ лару-тӑрӑва сӑнаса тӑрать. Арҫынпа хӗрарӑм Кивӗ Тутайкасси ялӗнчен. Вӗсем хӑйсене йӗркеллӗ туяҫҫӗ. Ялта вара карантин пулнине палӑртнӑ. Специалистсем республикӑри выльӑха тӗрӗслеҫҫӗ.
Ҫӗрпӳ районӗнче икӗ ҫын Ҫӗпӗр язвипе чирлесе кайни пирки пӗлтернӗччӗ. Аса илтерер: упӑшкипе арӑмӗ вӑкӑр пуснӑ чухне суранланнӑ. Хӑйсене япӑх туйма тытӑнсан пульницӑна кайса пулӑшу ыйтнӑ. Малтанлӑха пӗлтернӗ тӑрӑх, вӑкӑр лавккаран туяннӑ апата пула чирлеме пултарнӑ.
Вӑкӑр ашӗ вара ӑҫта кайнӑ? Mash Телеграм-канал пӗлтернӗ тӑрӑх, арҫын 500 килограмм аша сутма ӗлкӗрнӗ. Ӑна трасса ҫинче чикансем туяннӑ-мӗн. Халӗ вӗсем ӑҫти паллӑ мар.
Ҫӗрпӳ районӗнче икӗ ҫын Ҫӗпӗр язвипе чирлени ҫирӗпленнӗ. Унччен вӗсем ҫак чир паллисемпе пульницӑна лекнӗ. Паян вара диагноз чӑннипех те ҫапла пулни палӑрнӑ. Вӗсем иккӗшӗ те выльӑх пуснӑ чухне аманнӑ.
Ку чир Ҫӗпӗрте 100 ҫула яхӑн каялла алхаснӑ. Ун чухне вун-вун пин выльӑх, пин-пин ҫын вилнӗ.
Раҫҫейре юлашки хутчен Ҫӗпӗр язвипе пӗлтӗр ҫӗртме уйӑхӗн 22-мӗшӗнче Ставрополь крайӗнчи хӗрарӑм чирленӗ.
Паян Ҫӗрпӳ районӗнче «Ҫӗрпӳ мормышки» иртнӗ. Вӑл – пулӑҫсен тупӑшӗвӗ.
Пулӑ тытма юратакансем Кӑнар ял тӑрӑхӗнче пухӑннӑ. Вӗсем пӗр мормышкӑллӑ, пӗр йӗплӗ хӗллехи вӑлтапа пулӑ тытнӑ. Ӑмӑрту 3 сехете тӑсӑлнӑ.
Ҫӗнтерӳҫӗсене виҫе номинаципе палӑртнӑ: чи малтан пулӑ тытакан, чи пысӑк пулӑ тытакан, чи опытлӑ пулӑҫ. Ытти номинаци те пулнӑ. Мала тухнисене дипломпа, парнепе хавхалантарнӑ.
Кӑҫал республикӑра 40 шыв башнине юсама палӑртнӑ. Ку тӗллевпе хыснаран 100 миллион тенкӗ уйӑрӗҫ.
ЧР Строительство министерстви конкурспа 40 яла палӑртнӑ. Вӗсенче шыв башнисене улӑштарӗҫ. Уйӑрнӑ субсидие 5 района пайласа парӗҫ: Элӗк, Куславкка, Красноармейски, Муркаш тата Ҫӗрпӳ районӗсене.
+13.3 °C